Pagpatuman sang border restriction sa Iloilo Province, nagsugod na las 12:01 kaina sang kaagahon
By: JoMaque | Marso 18, 2020
Iloilo — Nagsugod na ang lubos nga pagpatuman sang border restriction sa Iloilo province las-12:01 kaina sang kaagahon nga magalawig tubtob Abril 14, sa pagtinguha nga indi makasulod ang COVID-19 sa probinsya.
Suno kay Governor Arthur Defensor Jr, nagsugod kahapon ang checkpoint sang mga pulis sa borders sang probinsya.
Magaupod naman subong nga adlaw ang mga health workers kag responders nga amo ang maga-check sang temperatura kag kondisyon sang magasulod sa probinsya.
Ginsulit sang gobernador nga wala na sang makasulod sa probinsya, magluwas lang sa mga nalakip sa exemptions nga iya ginplastar sa ginpaguwa nga executive order.
Gintumod ni Defensor ang mga government workers nga naga-perform sang ila trabaho, mga medical personnel kag health workers ukon humanitarian workers nga may function may kaangtanan sa COVID-19 sa probinsya; kag ang mga taga-Iloilo City nga nagapadulong kag nagahalin sa probinsya sang iloilo.
Nagalaum ang gobernador sang paghangup bangud para man sa kaayuhan sang tanan ang amo nga tikang.
Pasulaton naman sa health declaration card ang drivers kag pahinante sang mga trucks nga ma-deliver sang goods agud mahibaluan kun diin sila naghalin kag makadto kag kuhaan man sila sang temperatura.
188 QUARANTINE CONTROL POINTS
Nakabantay ang kapulisan sa 118 ka quarantine control points sa bug-os nga Western Visayas bilang pagsunod sa border restrictions nga ginmando sang tanan nga local government units sa region 6.
Suno kay Police Regional Office 6 spokesperson Police Lt. Colonel Joem Malong, nagpahamtang sang checkpoint operations ang kapulisan sa tanan nga boundaries agud mabantayan ang paguwa-sulod sang mga salakyan.
Nakabantay man ang kapulisan sa mga puerto kag paluparan sa diin ginapahanugutan lang ang mga cargoes kag ginadumilian ang mga pasahero.
Panghangkat naman sa kapulisan ang kakulang sa safety equipment sa ila pagbantay kapareho sang face masks bilang proteksyon batok sa virus.