Ordinansa nga magapatuman sang curfew sa Iloilo province, gin-aprubahan sang Sangguniang Panlalawigan

By: Aine Grace Bravo | via Aksyon Reports Afternoon Edition

ILOILO, March 19, 2020 — Gin-aprubahan sa special session sang Sangguniang Panlalawigan kaina sang hapon ang ordinansa nga magapatuman sang curfew sa bug-os nga probinsya bilang isa sa mga tikang nga mapunggan ang paglapta sang COVID-19.

Ginkumpirmar ini ni Iloilo 1st District Board Member Val Serag.

Suno kay Serag, sa ila gin-aprubahan nga ordinansa, ipatuman ang curfew halin las-nueve sa gab-i tubtob las-kuwatro sa kaagahon.

I-submit sang Provincial Board ang ordinansa kay Gov. Arthur Defensor, Jr. para mapirmahan. Pagkatapos sini, i-publish ang ordinansa sa newspaper (of general circulation) kag ginalauman nga mapatuman na sa Marso 21.

May mga exemptions sa ordinansa pareho ang mga government officials and employees nga nagahimo sang ila katungdanan, mga medical practitioners kag mga nagapauli halin sa ila trabaho.

Ang violator suno kay Serag, magabayad sang multa nga P2,500 (minimum) kag P5,000 (maximum).