Mayor Jerry Treñas, nag-ako nga may pagsunggod sa DOH bangud sa pagpabudlay sa pagbakal sang testing kits; Massive testing, gina-propose sang alkalde

By: Khenjo Terco | Via Aksyon Radyo Iloilo

Iloilo City — Nag-ako si Iloilo City Mayor Jerry Treñas nga nagasunggod siya sa Department of Health (DOH) bangud sa pagpabudlay sa pagbakal sang testing kits nga gamiton para sa suspected COVID-19 patients.

Suno kay Treñas, nagpahayag ang DOH nga makuha anay sang clearance sa ila antes ang pagbakal sang testing kits kag kon kinahanglanon.

Kuntani suno sa alkalde magbuligay sila sang DOH sa baylo nga pabudlayan bangud ang ahensiya man ang makapulos sa testing kits nga ihatag sang siyudad.

Nagpabutiyag pa ang alkalde nga antes ang pagpabakal sang testing kits sang private sector, gin-check man nila kon compatible ini sa machines nga ginagamit sa Western Visayas Medical Center (WVMC).

Ang sahi sang test kits nga ginbakal sang siyudad ang nakasulod man sa allowable test kits sang Food and Drug Administration (FDA).

May 100 ka testing kits nga nag-abot sa Iloilo halin sa gobyerno.

Pero dapat suno sa alkalde, madamo ang testing kits sang siyudad bangud bilog nga Western Visayas ang maggamit sini.

“MASSIVE TESTING”

Ginaduso man ni Treñas ang massive testing sa Iloilo rason nga kinahanglanon ang madamo nga testing kits.

Suno sa alkalde nakatuon siya sa ginpatuman nga massive testing sa South Korea.

Madasig suno sa iya nga ma-control ang paglapta sang COVID-19 kon may yara sang massive testing.