Ajuy Mayor Jett Rojas, nagkumpirmar nga may taga-banwa nga may sintomas kapareho sa COVID-19 nga napatay sa ospital

ILOILO – May napatay nga taga-Barangay Rojas, Ajuy nga may sintomas kapareho sang COVID-19.

Ginkumpirmar ini ni Mayor Jett Rojas sa iya Facebook post kag sa interview sang Aksyon Radyo Iloilo.

Suno sa alkalde, wala sang travel history, indi person under investigation kag indi man person under monitoring ang 59 anyos nga napatay.

Marso 26 sang gindala sa ospital malapit sa Ajuy ang pasyente bangud may severe tonsillitis. Sang Marso 29, gin-refer siya sa ospital sa Iloilo City bangud indi na makatindog kag nagahilanat kag may diarrhea.

Ginkumpirmar sang alkalde nga napatay kaina ang pasyente.

Nagahimo sang contact tracing ang LGU kag gin-lockdown ang Barangay Rojas para sa intensive disinfection.

Ginpahibalo man sang alkalde nga temporaryo siraduhan ang Ajuy Public Market buwas, Marso 31, para sa disinfection, kag magabalik sa pag-operate sa Abril 1.

Marso 17 suno kay Mayor Rojas sang may party sa balay sang pasyente kag may pito ka taga-Iloilo City nga bisita. Na-contact na ang mga bisita kag wala sila sang hilanat ukon balatian, suno sa alkalde.

Nagpangabay si Mayor Rojas sa mga pumuluyo nga indi magpanic bangud ginahimo sang banwa ang tanan agud ma-secure ang tanan. Ginahingyo niya lang ang kooperasyon kag pagbuligay agud nga malampuwasan ang problema nga dala sang COVID-19.