Entry points sang Calinog halin sa Lambunao, temporaryo nga ginpasiraduhan

By: JoMaque | Marso 31, 2020

Iloilo — Temporaryo nga ginpasiraduhan sang Calinog ang ila entry points halin sa Lambunao kasunod sang kamatayon sang pasyente nga taga-Lambunao bangud sang coronavirus disease (COVID-19).

Suno kay Calinog Mayor Francisco Calvo, luyag niya lang nga proteksyunan ang ila banwa batuk sa COVID-19.

Base sa Executive Order No. 29 nga ginpaguwa ni Calvo, ginadumilian ang tanan nga salakyan kag tawo nga makasulod sa Calinog nga nagalabay sa Lambunao.

Pero exempted ang mga health workers, empleyado kag opisyal sang gobierno, peace and order officers, humanitarian kag emergency services, delivery sang basic needs kag facilities, mga bantay sang pasyente nga naka-confine sa Dr. Ricardo S. Provido Sr. Memorial District Hospital nga may pamatuod kag dapat nga magpaidalum sa quarantine procedures antes makasulod sa banwa.

Magluwas diri, makasulod man ang mga taga-Lambunao nga may gina-uyatan nga quarantine pass.