94-anyos nga war veteran sa Miagao, nag-positibo sa COVID-19
By: JoMaque | Abril 6, 2020
Miagao – Nag-positibo sa COVID-19 ang 94-anyos nga war veteran sa Miagao. Ini ang ginkumpirmar ni Miagao Mayor Macario Napulan.
Suno kay Napulan, ‘physically fit’ ang wala ginhingadlan nga war veteran para sa iya edad kag nagalakat-lakat pa sa ila barangay.
May history sang diabetes ang war veteran kag naga-ubo sugod sang una nga semana sang Marso.
Marso 24 sang gindala siya sa health center sa Miagao bangud may hilanat, nalamigan, kag naga-ubo.
Gin-refer siya sa ospital kag gin-diagnose nga may pneumonia.
Naka-guwa sa ospital ang war veteran sang Marso 28 apang liwat nga gin-admit sa pribado nga ospital sang Marso 30.
Liwat nga ginbulong ang pneumonia kag ang diabetes sang natungdan tubtob nga gin-test siya sa COVID-19 sang Abril 1.
April 4 naguwa ang resulta kag nadiskubrehan nga positibo siya sa COVID-19.
Masami nga naga-deteriorate ang ikaayong lawas sang mga
pasyente nga tigulang apang pinasahi ang war veteran suno kay Napulan bangud naga-improve ang iya medical condition.
Ginsaylo na sa Western Visayas Medical Center ang pasyente.
‘2 confirmed case sa Miagao’
Ang 94-anyos nga war veteran nga gin-classify si WV31 ang ikaduha nga COVID-19 patient sa Miagao.
Una na gin-anunsyar sang DOH nga nagpositibo sa COVID-19 ang 22-anyos nga babaye sa Miagao.
Si WV 12 ang nakabyahe sa Manila.
Suno kay Napulan, malayo ang balay ni WV31 kag WV12.
Dugang niya, wala man nakabyahe sa iban nga lugar ang war veteran.
Ginaduso ni Napulan ang pagtest sa COVID-19 sa tanan nga upod sa balay ni WV31.
Nagsugod na ang contact tracing sang LGU.
‘Lockdown ang barangay’
Nagmandu naman sang ‘lockdown’ si Napulan sa barangay nga ginapulian sang war veteran.
Wala sang may mahimo makaguwa ukon sulod sa wala pa ginhingadlan nga barangay.
May satellite market sa ila barangay kag mabulig man ang LGU sa paghatag sang ila supply.
Suno sa alkalde, ma-contact nalang ang mga pumuluyo sa ila barangay officials sang ila kinahanglanon agud malikawan ang paguwa sa ila balay.
Nagpang-disinfect naman ang LGU sa barangay.
‘Mas istrikto’
Mas mangin istrikto ang LGU sa pagpatuman sang mga polisa agud malikawan ang paglapta sang kagaw.
Nagpanawagan naman si Napulan sa mga pumuluyo sa Miagao nga indi magpakulba.
Importante nga indi gid maguwa sa panimalay luwas lang sa importante kag emerhensiya.
Importante man ang mga precautionary measures kasubong sang paggamit sang mask, pag-observe sang social distancing kag proper hygiene.
Importante man ang pagkaun sang masustansiya nga pagkaun kag dapat man likawan ang pagpulaw.
Ginakuhaan pa sang Aksyon Radyo Iloilo sang pahayag ang DOH 6 natuhoy diri.