Asawa nga gin-hostage sang iya bana sa Estancia, naluwas sang mga brgy officials kag pulis

By: JoMaque | Abril 8, 2020

Estancia, Iloilo – Hilway na ang asawa kag iya bata sang gin-hostage sang bana sa Calapdan, Estancia kahapon, Abril 7.

Nakaguwa sa balay ang mag-iloy sang gin-negosyar ni Punong Barangay Bonnie Bayon ang suspek.

Suno kay Bayon, nagahilibion ang bata sang iya naabtan sa balay samtang gina-hostage sila upod ang iloy. May impormasyon man ang kapitan nga may nauyatan nga kutsilyo ang suspek.

Tatlo ka oras suno kay Bayon ang negosasyon antes ginhatag ni Alyas Ivan ang ila bata kay Alyas Emma kag nakaguwa sa balay ang mag-iloy.

Ginhangkat pa ni Ivan ang kapitan.

Base naman sa interview kay Alyas Emma, hubog ang iya bana kag nag-away sila antes natabo ang insidente.

May nakita man nga lagub, bukol kag dugo sa lawas sang asawa, dugang pa sang kapitan.

Pwersa nga ginsulod ang balay kag gindakup si Ivan. Gindala na sa ospital ang suspek agud ipacheck-up.

Suno naman kay Police Major Rene Obregon, hepe sang Estancia Police Station, ibalik sa barangay ang kaso bangud away ini sang mag-asawa.

Posible suno kay Obregon nga nagaproblema ang bana bangud wala sang byahe dala sang Enhanced Community Quarantine. Pagbyahe sang motorsiklo ang palangabuhian sang bana.