Expanded ECQ sa Iloilo City, gin-amendaran ni Mayor Jerry Treñas

By: Aine Grace Bravo | via Jeremae Ventar

ILOILO CITY, April 15, 2020 — Gin-amendaran ni Iloilo City Mayor Jerry Treñas ang expanded enhanced community quarantine kada Sabado kag Domingo.

Sa Executive Order 063-A s. of 2020 nga ginpaguwa sang alkalde kaina sang hapon, ginpasugtan nga maka-operate ang mga supermarkets, sari-sari stores, groceries, convenience stores sa Abril 18, 19, 25 kag 26 pero halin lang las-nueve sa aga tubtob las-tres sa hapon.

Pero istrikto nga ipatuman ang market guidelines kag dapat mag-gamit sang shopping baskets. Dapat man nga may quarantine pass kag nakasuksok sang face mask ang customer.

Bukas man ang mga financial institutions, bangko, money transfer services kag payment kag remittance centers pero halin lang las-nueve sa aga tubtob la-una sa hapon.

Samtang ang mga take-out kag delivery services sang pagkaun, ang mga gasolinahan, laundry kag water refilling stations ang pasugtan man nga magbukas, pero magapanirado pag-abot sang las-tres sa hapon.

Exempted sa EO ang mga ospital, medical clinics, pharmacies kag drugstores, lakip man slaughterhouse, fishing port operations, arrastre, cargo, logistics, deliveries, kag utilities.