Mga public officials sang Guimaras, nagpa-iway sa pagbaton sang ayuda nga ipanghatag sang Guimaras provincial government

By: JoMaque | Abril 15, 2020

Province of Guimaras — Nag-paiway ang mga public officials sang Guimaras sa pagbaton sang tag-isa ka sako nga bugas nga ipanghatag sang Guimaras Provincial Government sa tanan nga Guimarasnon.

Suno kay Guimaras Vice Governor John Edward Gando nagdesisyon sila nga mga opisyal nga magpaiway para nga ihatag na lang sa mga mas nagakinahanglan ang ayuda nga ila mabaton.

Ginabanta sa kapin 50,000 ka pamilya suno sa bise gobernador ang makabaton sang bugas kag mga groceries halin sa provincial government.

May una na nga napanghatag nga tunga sa sako nga bugas suno kay Vice Govrnor Gando kag my ipaapas pa nga tunga sa sako. Amat-amat lang suno sa iya ang pagpanghatag sang ayuda sang probinsya bangud wala pa nahibaluan kun tubtob san-o matapos ang problema sa COVID-19.

Umpisa las 12:01 kaina sang kaagahon nag-umpisa na ang level 2 enhanced community quarantine Guimaras.