Philippine Army kag NPA, nag-engkwentro sa Miagao -3rd ID

By: Khenjo Terco | Via Aksyon Radyo Iloilo

Ginkumpirmar ni Captain Cenon Pancito III, Spokesperson sang 3rd Infantry Division nga may engkwentro sa Sitio Anoy, Brgy Cabalaunan, Miag-ao sa tunga sang mga soldado kag New People’s Army.

Suno naman kay Lt. Col. Joel Benedict Batara, commanding officer sang 61st Infantry Battalion, nag-conduct sang combat operation ang ila tropa sa training area sang NPA sa lugar.

Nakabaton sang impormasyon ang Philippine Army nga massive ang recruitment sang NPA sa mga menor de edad sa nasambit nga lugar.

Ginabanta 40 ka miembro sang Suyak Platoon, Southern Front, Komiteng Rehiyon Panay ang na-engkwentro sang mga soldado 10:20 kaina sang aga.

As of 11:40 A.M., nagapadayon pa ang engkwentro apang malaka na lang ang mga lupok nga mabatian.

Abril 7 sang nag-engkwentro man ang tropa sang gobyerno kag NPA sa Barangay Panuran, Lambunao nga nagbilin sang napatay nga soldado.

Abril 16 sang nabalik sa opensiba ang mga soldado batuk sa NPA bangud natapos na ang gindeklarar nga ceasefire ni Presidente Rodrigo Duterte.

Ginpalawig naman sang NPA ang ceasefire tubtob sa Abril 30.

Ang Barangay Cabalaunan ang ginabanta 14 km ang kalayuon sa poblacion sa Miagao.