3 suldado, patay sa engkwentro sa tunga sang militar kag ginapatihan miembro sang NPA sa Himamaylan, Negros Occidental

By: JoMaque | Abril 20, 2020

Negros Occidental—Tatlo ang patay kag apat ang pilason sa mga miembro sang 94th Infantry Battalion sa natabo nga engkwentro sa tunga nila kag mga ginapatihan miembro sang New People’s Army (NPA) sa Sitio Tugas, Barangay Carabalan, Himamaylan, Negros Occidental las 10:00 kahapon sang aga, Abril 19.

Suno kay 303rd Brigade Commander Colonel Inosencio Pasaporte, natabo ang engkwentro samtang nagahimo sang community security patrol ang military sa tagtaganay sang Social Amelioration Program sa kaiping nga barangay.

Dugang ni Pasaporte nga nakabaton sang report ang mga suldado sa presensiya sang rebelde rason nga ginpadal-an liwat sang dugang nga tropa ang lugar apang natabo ang engkwentro sa diin, ginhabuyan sang mga rebelde sang granada ang militar.

Nag-ayo naman si Pasaporte nga indi pa nila mapagwa ang ngalan sang mga napatay kag napilasan bangud nagapakig-angut pa sila sa pamilya sang mga biktima.

Gina-usisa naman sang militar kun may napatay ukon napilasan sa grupo sang mga rebelde bangud may nakita nga tinulo sang dugo sa ginluntaran sang engkwentro.