Ikaduha nga COVID-19 positive sa Negros Occidental, family driver sang mag-asawa nga nagpositibo sa COVID-19 sa Pavia

By: JoMaque | Abril 21, 2020

Negros Occidental—Naka-record sang ikaduha nga kaso sang coronavirus disease ukon COVID-19 ang Negros Occidental.

Ini ang ginkumpirmar ni Negros Occidental Governor Eugenio Jose “Bong” Lacson.

Ang 43-anyos nga lalaki ang residente sang Barangay Nato, Las Castellana, Negros Occidental.

May close contact si Patient number 2 sang Negros Occidental kanday Western Visayas Patient number 37 kag Western Visayas Patient number 38, ang mag-asawa nga taga-Pavia nga nagpositibo sa una nga test apang nag-negatibo na sa repeat test sang damlag lang.

Si Patient number 2 sang Negros Occidental ang nagserbe nga family driver sang mag-asawa.

Sang Marso 13, nagpauli ang amo nga pasyente sa Negros.
Ang pasyente ginpaidalom sa home quarantine nga nagtapos sang Marso 28.

Nagtuhaw ang sintoma sang Abril 5 kag 6, ginhilanat kag na-LBM sang duha ka adlaw ang pasyente apang wala nagpakonsulta sa doktor.
Sang Abril 5 nag-positibo sa COVID-19 ang iya amo kag ama kag ginpahibalo siya tuhoy diri sang Abril 8.

Sang Abril 11, ginpahibalo niya ang ila banwa rason nga gin-quarantine siya sa pasilidad.

Ginkuhaan ang pasyente sang swab sang Abril 12 nga ginpadala sang Abril 13.
Kahapon, naguwa ang resulta nga COVID-19 positive siya.