Crime volume nga na-record samtang ginapatuman ang ECQ sa Iloilo Province, nagnubo –IPPO Spox

By: JoMaque | Abril 22, 2020

Iloilo — Nagnubo ang crime volume nga na-record sa bug-os nga probinsya sang Iloilo halin sang gin-implementar ang enhanced community quarantine bangud sa COVID-19.

Suno kay Iloilo Police Provincial Office spokesperson PMS Francisco Lindero, halin Marso 17 tubtob Abril 21, 2020, 246 ka crime incidents ang na-record sa probinsya. 63 porsyento ini nga mas manubo sa 667 nga na-record sa kapareho nga period sang 2019.

Ginpasalig ni Lindero nga padayon nga nakabantay ang mga pulis agud mamentinar ang kalinong kag katawhay.

“CURFEW VIOLATORS”

Naka-record naman ang IPPO sang 360 ka curfew violators halin Marso 21 tubtob Abril 21, suno kay PMS Lindero.

Ang lima ka banwa nga may pinakamadamo nga violators amo ang: Pavia, 145; San Rafael, 49; Sta Barbara, 25; Passi City, 19, kag Cabatuan, 15.

Ginbuyagyag ni Lindero nga may nga curfew violators nga ginkasuhan, indi bangud sa paglapas sang curfew kundi bangud sa resisting arrest.

Naganubo naman ang violators samtang nagalawig ang pagpatuman sang curfew. Posible suno kay Lindero nga nahangpan na sang mga tawo ang ka-importansya sang ginapatuman nga tikang agud makalikaw sa COVID-19.