Pagpanghatag sang financial assitance sa idalom sang Social Amelioration Program, dapat matapos antes i-lift ang Enhanced Community Quarantine –DSWD

By: JoMaque | Abril 22, 2020

Iloilo City – Ginpahanumdom ni Department of Social Welfare and Development (DSWD) Assistant Secretary Rhea Peñaflor nga dapat mapanghatag na ang financial assistance sa idalom sang Social Amelioration Program sa mga benipisyaryo.

Suno kay Peñaflor, nakabutang sa guidelines nga i-postpone ang pagpanghatag sang financial assistance kon maabtan sang lifting sang Enhanced Community Quarantine (ECQ).

Ibalik suno sa iya ang pondo sa DSWD kon wala nahingagaw panghatag antes ang lifting sang ECQ.

Gin-athag ni Peñaflor nga ginahatagan ang mga local government units (LGUs) sang lima ka adlaw agud ipanghatag ang pundo sugod nga nabaton ang kwarta halin sa DSWD kag pito ka adlaw naman sa mga malayo nga lugar.

Sa Western Visayas, 100% na sang mga LGUs ukon 133 ka LGUs na ang nakabaton sang pundo halin sa DSWD kag 45 LGUs na ang naka-distribute sang pondo.

Samtang, ginpangabay naman ni Peñaflor ang mga wala nadala sa listahan sang mga beneficiaries nga nagapati nga kwalipikado sila nga makabaton sang assistance nga magpalista lang sa CSWDO ukon MSWDO agud matipon ang apelasyon kag i-sumiter sa regional office sang DSWD.

Dapat makapalista antes magtakop ang tatlo ka adlaw matapos ang payout sang financial assistance sa ila lugar.