Burgos, La Paz, nagpang-disinfect sang nabal-an nga halin sa ila barangay ang nagpositibo sa #COVID-19

By: JoMaque | Abril 24, 2020

Iloilo City — Ginmanduan ni Punong Barangay Lilibeth Eduardo sang Burgos La Paz, nga magpang-disinfect ang cash for work personnel sang nabalitaan niya nga residente sang ila barangay ang 51-anyos nga babaye nga nagpositibo sa COVID-19.

Base sa data nga ginpaguwa sang DOH kahapon, Abril 22, halin sa Manila si WV 55 kag nagapa-idalum sa home quarantine.

Suno kay Punong Barangay Eduardo, gin-commission niya ang iya cash for work personnel para magpang-disinfect sa ila barangay.

Ang pagpang-disinfect ginhimo nila para masigurado nga wala sang virus sa ila lugar nga makahalit sa ikaayong lawas sang mga residente.

Ginkumpirmar man ni Eduardo nga malapit sa Barangay Hall ang balay ni City Legal Officer Atty. Edgar Gil nga amay ni WV 55. Wala sang ideya ang punong barangay kun didto man naka-quarantine ang 51-anyos.