Coordinator sang Bayan Panay sa Iloilo City, gintiro patay sa Sto. Niño Norte, Arevalo

By: JoMaque | Abril 30, 2020

Iloilo City — Patay ang coordinator sang Bayan Muna sa Iloilo City nga si Jory Porquia sang gintiro sa sulod sang iya kalan-an sa Sto. Niño Norte, Arevalo mga las 5 kaina sang kaagahon.

Sa initial nga imbestigasyon, mahimos kuntani mapa-Terminal Market ang biktima para sa pagbukas sang iya kalan-an sang may nagsulod nga duha ka lalaki nga may ginapugos man nga lalaki, ginpaluhod kag ginpaduko.

Ginkilala ang ginpugos kay alyas Toto.

Suno kay Toto, naga-jogging siya sa baybay malapit sa puwesto ni Porquia sang ginsipit siya sang duha ka lalaki kag gindala sa sulod sang kalan-an sang biktima.

Ginpaluhod siya sang duha ka lalaki kag gintabunan sang mga suspects sang ila lawas ang iya mata.

Nagapungko naman suno sa iya si Porquia.

Sang nagaduko na si Toto, nabatian niya ang mahinay nga apat ka lupok.

Ginhambalan si Toto sang mga suspects nga mamuklat lang kun maghalin na sila.

Wala gilayon nakapangayo sang tabang si Toto bangud naurungan siya sang nakita nga duguon si Porquia.

Ang upod ni Porquia nga nakakita amo ang nagpangayo sang tabang suno kay Toto.

Suno naman kay Lt. Colonel Hilarion Roga sang Scene of the Crime Operatives (SOCO), may siyam ka mga pilas ang biktima.

May tatlo ka pilas sa liug, tatlo ka pilas sa dughan si Porquia. May yara man siya sang defense wounds sa kamot.

Na-recover sa crime scene ang tatlo ka basiyo sang .9mm kag anum ka basiyo sang caliber .22.