Western Visayas, mahimo ipaidalum sa GCQ magluwas sa mga lugar nga makabig ‘hotspots’- health experts
By: JoMaque | May 11, 2020
Iloilo City — Mahimo ipaidalum sa General Community Quarantine ang Western Visayas sa tunga sang COVID-19 threat magluwas sa mga lugar nga makabig ‘hotspots’ suno sa mga health experts.
Sa Public Health Data Analysis and Recommendations for COVID-19 sa Western Visayas nga gin-publish nanday Philip Ian Padilla, MD kag PhD, kag Joseph Arbizo, Registered Medical Technologist (RMT), sang University of the Philippines Visayas, kag Dr. Helena Marie Lagon Alvior kag Mary Camille Samson, RMT, sang Non Governmental Organization nga ThinkWell Philipines, nadiskubrehan nga .99 ang average sang R naught ukon Reproductive Number sa Western Visayas.
Ini ang base sa April 30 nga data halin sa Department of Health 6.
Ginapakita sang Reproductive Number kun ano ka makalalaton ang infectious disease base sa ma-record nga confirmed cases.
Bisan may nagadugang nga mga bag-o nga kaso sang COVID-19, makabig nga naganubo ang paglapta sang kagaw sa rehiyon bangud sa mas manubo sa 1 nga reproductive number.
Sa pagkuha sang reproductive number, ginakonsiderar ang bag-o nga mga kaso, kun kasan-o nabatyagan sang mga COVID-19 patients ang ila mga sintomas, kag kun sa diin sila nga lugar naghalin.
Kun mas mataas sa 1 ang reproductive number, ginapakita sini nga madasig man ang paglapta sang kagaw.
Probinsya sang Iloilo ang may pinakamataas nga reproductive number nga naglab-ot sa .95, ginsundan ini sang Antique nga may .93, .92 sa Iloilo City, .89 sa Bacolod City, .83 sa Aklan, .8 sa Capiz, kag .75 sa Negros Occidental.
Makabig high to moderate sa gihapon ang risk level sa Antique, probinsya sang Iloilo kag Iloilo City samtang moderate naman sa Aklan, Capiz, Negros Occidental, kag Bacolod City.
Low ang risk level sa Guimaras.