Western Visayas, na-classify bilang low risk sa COVID-19 kag indi na pagpaidalum sa anuman nga community quarantine

By: JoMaque | May 12, 2020

Gin-anunsiyar ni Presidential Spokesperson Harry Roque nga gin-classify ang Western Visayas sa “low risk” area sa coronavirus disease (COVID-19).

Indi na pag-ipaidalum sa General Community Quarantine ukon Enhanced Community Quarantine ang mga siyudad kag probinsiya sa mga isla sang Panay (Iloilo City, Iloilo Province, Aklan, Antique, Capiz, Aklan), Negros Occidental kag Guimaras pagkatapos sang Mayo 15.

Base ini sa Inter-Agency Task Force Resolution No. 35 nga gin-aprubahan kasunod sang ginhiwat nga meeting.

Ang announcement ginhimo ni Roque, pila ka oras matapos ang makahalawat-hawat nga public address ni Presidente Rodrigo Duterte las otso kaina sang aga sa diin ginbantayan kun lawagon niya kun ano ang mga areas nga napaidalum sa GCQ ukon ECQ pero wala natabu.

Sa iya speech, ginpahayag sang pangulo nga indi masarangan sang pungsod ang second wave ukon third wave sang infections kun indi magsunod ang mga tawo sa health protocols batok sa COVID-19.

Yari ang mga classification sang risk levels kag rekomendasyon sang IATF sa kada rehiyon base sa gin-aprubahan nga Resolution Number 35:

1. Low Risk (Green) Indi na pagpaidalum sa GCQ ukon ECQ
a. Region I – entire
b. Region IV-B – entire
c. Region V – entire
d. Region VI – entire
e Region VIII – entire
f. Region X – entire
g. Region XII – entire
h. ARMM – entire

2. Moderate (Yellow) Ipaidalum sa GCQ sa Mayo 16 tubtob 31, 2020
a. Region II – entire
b. Region III – entire
c. Region IV-A – entire except Laguna
d. CAR – entire
e. Region VII – entire except Cebu
f. Region IX – entire
g. Region XI – entire
h. Region XIII – entire

3. High (Red) Ipaidalum sa Modified ECQ sa Mayo 16 tubtob Mayo 31, 2020
a. Laguna (Region IV-A)
b. NCR
c. Cebu City (Region VII)

Sa idalum sang Modified ECQ, may mga industriya nga pasugtan nga magbukas.

Ginpahayag ni Roque nga may tubtob buwas, Mayo 13, ang mga probinsiya, highly urbanized cities (HUCs) kag mga Independent Component Cities (ICCs) nga gin-classify bilang low, moderate ukon high-risk para mag-apelar sang ila classification sa IATF Screening and Validation Committee kag dapat nga may concurrence sang Regional IATF.

Ginkalipay ni Mayor Jerry Treñas ang pagpaidalom sa Iloilo City sa low risk (wala sang community quarantine).

Suno sa alkalde, mapagguwa siya sang Executive Order para sa guidelines sang siyudad.

Ginpahayag ni Treñas nga mapabilin sa gihapon ang curfew halin las 9 sa gab-i tubtob las 4 sa aga.

Ang liquor ban ang i-lift naman apang may mga limitasyon sa numero sang mabakal.

Dugang pa sang alkalde indi niya pag-gulpihon ang transition halin ECQ tubtob low risk.