CIDG, gina-imbestigaran ang ginreklamo pagbuhin sang nabaton nga SAP subsidy sang mga beneficiaries sa 2 banwa sa probinsya sang Iloilo

By: JoMaque | May 13, 2020

Iloilo — Gina-imbestigaran sang Criminal Investigation and Detection Group ang ginreklamo pagbuhin sa nabaton nga Social Amelioration Program subsidy sa mga beneficiaries sa duha ka mga banwa sa probinsya sang Iloilo.

Suno kay Lt. Emmanuel Tigson, team leader sang CIDG-Iloilo Province Field Unit, indi pa nila mahingadlan ang duha ka mga banwa kag kun sin-o ang ginareklamo bangud nagapadayon pa ang ila imbestigasyon.

Sa inisyal nga impormasyon nga nakuha sang CIDG, ginbuhinan sang P1,000 ang nabaton nga P6,000 SAP subsidy sang tagreklamo.

Suno naman sa isa pa ka tagreklamo, wala ang iya ngalan sa listahan sang mga beneficiaries apang nakibot sang nakabaton sang SAP subsidy.

Ginbuhinan man sang P1,000 ang nabaton niya nga SAP subsidy.

Ginatinguhaan sang CIDG nga makakuha sang dugang nga impormasyon.

Pasabton naman sang CIDG ang ginareklamo kag i-check man nila ang nagakaigo nga mag dokumento.

May iban pa nga mga impormasyon nga nabaton ang CIDG-Iloilo PFU apang gin-refer nila sa DSWD.

Kalabanan sang amo nga mga impormasyon ang natuhoy sa indi pagbaton sang ayuda bisan qualified kag reklamo nga nakabaton ang kasilingan bisan indi qualified.

Mahimo maka-contact sa CIDG-Iloilo PFU sa numero: 0961-752-9115/ (033) 330 05 10.

Mahimo man sila ma-contact sa cidgiloilopfu@yahoo.com .