Banate Mayor Carlos Cabangal, nagkumpirmar nga BJMP personnel si WV 100

By: JoMaque | May 15, 2020

Banate, Iloilo – Nagatrabaho sa Bureau of Jail Management and Penology (BJMP) ang 23 anyos nga lalaki nga taga-Banate nga gin-report sang DOH 6 nagpositibo sa COVID-19 kag gin-identify nga si WV 100.

Ginkumpirmar ini ni Banate Mayor Carlos Cabangal.

Base sa impormasyon nga nakuha ni Cabangal, naka-upod ni WV 100 sa salakyan si WV 59, ang 31 anyos nga lalaki nga BJMP personnel kag taga-Zarraga, kag ini man ang ginkumpirmar ni Dr. Ma. Sophia Pulmones sa press conference subong nga hapon.

Madumduman, gin-ako ni BJMP 6 spokesperson Jail Supt Gilbert Peremne nga nagbiyahe pa-Antique si WV 59 sang Abril 25, 2020 bangud may gin-deliver sa pila ka jail facilities. Sa amo man nga fetsa, nagguwa ang resulta sang RT-PCR test kay WV 59 nga positibo gani ginmanduan siya kag iya mga kaupod nga magbalik sa Iloilo City.

Gina-usisa pa ni Mayor Cabangal kun san-o katapusan nga nagpauli sa Banate si WV 100. Ginmanduan naman ni Cabangal ang punong barangay sa diin naga-istar si WV 100 nga ipa-home quarantine ang pamilya sang jail personnel.