HPG-Iloilo, magasunod sa Memo sang LTO nga nagabawal sa angkas sa motorsiklo
By: JoMaque | May 22, 2020
Iloilo City–Sundon sang Highway Patrol Group-Iloilo ang memorandum circular sang Land Transportation Office nga nagabawal sa pagpa-angka sa motorsiklo.
Suno kay PLT Pedro Macababbad sang HPG-Iloilo, yara sila sa idalum sang national Inter-Agency Task Force kag sundon nila kun ano ang mandu halin sa national government.
Lakip suno sa iya sa LTO memo ang pagbawal sa angkas sa motor bangud makabig ini nga reckless driving kag excess passenger.
Pero sa karon ginapahibalo lang anay nila ang publiko kag ginahambalan nga indi na pagsuliton.
Ginabanta sa 200 ka motorcycle riders nga may angkas na ang napaandaman sang HPG subong nga Mayo.
Una diri, ginpahanumdom sang Department of Transportation sa mga motorista nga nagabiyahe sa mga public highways sa mga areas nga naka-General Community Quarantine (GCQ) ang mga grounds kag kabaylo nga sanctions kun mapaslawan sila mag-comply sa safety guidelines kag protocols sa idalum sang Memorandum Circular 2020-2185 sang Land Transportation Office-Philippines (LTO).
Ang LTO memo naga-unod sang enforcement sang regulations nga gin-issue sang DOTr may kaangtanan sa operation sang land transportation sa mga areas nga sa idalum sang GCQ.
Ang memorandum circular nagasakop sang tanan nga sahe sang motor vehicles—private man, for hire, ukon government vehicle.