DOH 6, nagpa-athag sa pagpositibo sang 2 new COVID-19 cases sa rehiyon bisan negatibo ang una nga RT-PCR Test

By: Aine Grace Bravo

ILOILO CITY, May 23, 2020 — Nagpa-athag ang Department of Health 6 sa posible rason kun ngaa nagpositibo sa COVID-19 ang duha ka bag-o nga kaso sa Western Visayas bisan negatibo ang una nga resulta sang ila RT PCR Test.

Suno kay DOH 6 Assistant Director Dr. Ma. Julia Villanueva, si Western Visayas 106 ang una ginkuhaan sang swab sang Mayo 12 kag negatibo ang resulta.

Pero  sang ginkuhaan siya liwat sang swab sang Mayo 20, positibo na siya sa COVID-19 base sa resulta nga nagguwa kahapon, Mayo 22.

Si Western Visayas 107 naman nga seafarer kag isa sa mga nag-abot sa Iloilo City sang Mayo 20, negatibo sa COVID-19 base sa RT-PCR test result niya halin sa Manila. Ginkuhaan siya liwat sang swab, upod sa iban pa nga repatriated OFWs nga nag-abot sang amo man nga adlaw, kag naguwa ang resulta kahapon nga positibo.

Posible suno kay Villanueva nga manubo ang viral load sang ginkuhaan ang duha sang swab gani wala nakuha ang virus ilabe pa nga asymptomatic sila. | via Firingline