709 repatriated OFWs, magaabot sa Western Visayas subong nga adlaw

By: JoMaque | May 25, 2020

Iloilo City — 709 ka mga repatriated Overseas Filipino Workers ang natalana mag-abot sa Western Visayas halin sa Manila subong nga adlaw.

Ini ang ikalima nga batch sang nga OFWs nga ginbyahe papauli sa rehiyon sakay sa 2Go vessel sa idalum sang Balik Probinsya Program suno kay OWWA6 OIC Rizza Joy Moldes.

Sa amo nga numero, 477 ang taga Panay kag Guimaras samtang 232 naman ang taga Bacolod City kag Negros Occidental.

Sa 477 sa Panay kag Guimaras, 233 ang taga probinsya sang Iloilo, 78 ang taga syudad sang Iloilo, 47 sa Aklan, 37 sa Antique,16 sa Guimaras, kag 66 sa Capiz.

Sa 232 nga manaug sa BREDCO port, 91 ang taga Bacolod City samtang 141 ang taga Negros Occidental.

Gin-subject na sa RT PCR test ang mga OFWs kag negatibo ang resulta kag nakatapos naman sa 14-day quarantine period.

Pag-abot sa Iloilo, i-quarantine sa hotels sa syudad ang mga taga Guimaras kag syudad kag probinsya sang Iloilo magluwas sa mga OFWs nga taga Badiangan, Cabatuan, kag Tubungan nga ideretso naman sa quarantine facility sa ila banwa.

Ang mga OFWs nga taga Antique, Capiz, kag Aklan ang ideretso naman sa ila probinsya.

Ini ang pinakadamo nga batch sang OFWs nga ginbyahe papauli sa rehiyon.

Suno kay Moldes, duha ka beses sa kada semana ang schedule sa pagbyahe sa mga OFWs papauli sa Western Visayas.