23-anyos nga lalaki, patay sang ginlabo samtang nagakatulog sa iya payag sa Batad

By: JoMaque | May 31, 2020

Iloilo — Patay ang 23-anyos nga lalaki sang ginlabo samtang nagakatulog sa iya payag sa Brgy. Bulak Sur, Batad, Iloilo las 10:30 kagab-i. Mayo 30.

Suno kay Police Staff Sergeant Francis Jan Aricaya, imbestigador sang Batad Municipal Police Station, nagakatulog si Dione Dillomes sang ginsulong siya sang suspek nga si Ricanor Valdevieno, 62-anyos dala ang 24 inches nga binangon.

Dugang diri, hinali lang ginlabo sang suspek ang tiil ni Dillomes rason nga nakabugtaw ang biktima kag nakapalagyo.

Ginpahayag ni Aricaya nga bangud sa pilas sa tiil sang biktima, natumba siya rason nga naabtan sang suspect kag padayon nga ginlabo tubtob nga napatay.

Daan nga hiligut-anon ang ginalantaw sang kapulisan nga motibo sa pagpatay sa biktima.

Preso subong sa Batad MPS ang suspek kag ginapreparar na ang dokumento para sa kaso nga ipasaka batok sa iya.