Amay sa Oton, nagtanyag sang iya baligya nga mga utanon sa barter group sa Facebook para maggamit sa pag-eskwela sang iya bata

By: JoMaque | June 4, 2020

Iloilo — Para masiguro nga safe ang ila bata sa pagbalik sang klase bangud sang COVID-19 threat, nagdesisiyon ang mag-asawa sa Oton nga mag-online class ang ila anum ka tuig nga bata nga lalaki.

Apang wala sila sang cellphone nga mahimo magamit gani bilang solusyon, gintanyag sang 29-anyos nga amay nga si Arvin Aldama ang mga baligya niya nga ulutanon sa Iloilo Barter Society: 50 kilo sang kalabasa, 20 kilo sang kapayas, 20 kilo sang monggo, 10 bugkos sang Chinese kangkong, 10 bugkos sang tugabang,10 bugkos sang alogbate, kag 5 bugkos sang dahon kamote kabaylo sang second hand nga cellphone nga mahimo magamit sang iya bata.

Sa sulod sang isa lang ka adlaw, madamo ang interesado sa tanyag ni Aldama kag gilayon niya nga gin-close ang deal.

Kahapon sang aga, nagkitanay ang amay kag ang ka-barter niya apang sa baylo kuhaon ang mga ulutanon, nagdesisiyon ang ka-barter nga ihatag na lang ang cellphone.

Dugang niya, mahimo man ibaligya sang amay ang mga utan nga i-barter kuntani.

May ginhatag man nga hampangan ang ka-barter.

Suno kay Aldama, wala gid siya naglaum nga mangin positibo ang resulta sang iya pag-barter, apang ginkalipay bangud may magamit na ang iya bata sa pag-eskwela.

Ginakalipay man sang amay nga makita ang iya bata nga nalipay man sang ginhatag sa iya ang cellphone.

Naghingyo ang ka-barter nga indi lang siya paghingadlan.

Ang Iloilo Barter Society isa sa mga Facebook Groups nga nagahatag sang oportunidad sa pag-barter ukon sa pagbayluhanay sang mga gamit ukon produkto.