Igbaras Mayor Jaime Esmeralda, nagalaum nga ma-review ang sistema sa COVID-19 testing sa Western Visayas

By: JoMaque | June 13, 2020

Nagalaum si Igbaras Mayor Jaime Esmeralda nga ma-review ang sistema sa COVID-19 testing sa Western Visayas agud malikawan ang human error sa ginapagguwa nga mga resulta.

Ang pahayag ginhimo ni Esmeralda kasunod sang pagnegatibo sang resulta sang ikaduha nga RT-PCR test sa Sangguniang Bayan member, lima ka adlaw lang makaligad ang una nga test nga nagapakita nga positibo siya sa virus.

May mga factors nga ginalantaw ang alkalde sa paglain sang resulta sang test sa SB member sa malip-ut lang nga tiun.

Isa diri suno kay Esmeralda ang posibilidad nga may virus gid man siya pero asymptomatic kag sa una nga test sang Mayo 27, posible nga may mga bilin pa sang patay na nga virus nga na-detect ang RT-PCR kag sa ikaduha nga test sang Hunyo 2, posible nga wala na-na-pick up ang virus sa iya lawas.

Wala man ginadula suno kay Esmeralda ang posibilidad nga may human error nga natabu–na-contaminate ang specimen, typographical error ukon may nagbayluhanay nga specimen sa Western Visayas Medical Center-Sub National Laboratory ilabe na nga tuman ka damo sang samples nga ginapadala sa laboratory.

Nagalaum ang alkalde nga indi na masulit ang natabu sa ila bangud tuman suno sa iya ang epekto sa ila–indi lang sa pasyente kundi sa bilog nga banwa, “Sobra ka grabe gid. Ang anxiety, ang stress, ang hadlok, ara gid. Amo na nga halos tanan nga aspeto sang kabuhi mo apektado gid—ang state of mind, pscyhological, economical, ang amon negosyo, ang amon pumuluyo, ang espiritwal nga kabuhi, waay na kami misa, more importantly ang moral aspect. Nag-low esteem ang pumuluyo bangud sang diskriminasyon. I hope nga maka-recover kami gilayon sa natabu sa amon.

Ginpahibalo man sang alkalde nga negatibo man ang resulta sang iya nga test.

49 pa lang ang nagguwa nga resulta sa 100 nga gin-swab nga naka-contact sang pasyente. | via Aksyon Hotline