Munisipyo sang Igbaras, balik serbisyo na sa Lunes,Hunyo 15

By: JoMaque | June 14, 2020

Iloilo — Balik serbisyo na ang munisipyo sang Igbaras sugod sa Lunes, Hunyo 15.

Ini ang pahayag ni Igbaras Mayor Jaime Esmeralda sang nagnegatibo ang resulta sang ila labing una nga COVID-19 patient nga Sangguniang Bayan member sa ikaduha nga test kag mga nagka-contact sa iya.

Ginpahayag ni Dr. Stephanie Abello, chief sang Western Visayas Medical Center Sub- National Laboratory nga 133 ang nagka-contact kay WV 114 kag 80 percent sa ila ang negatibo sa COVID-19. Ginahulat pa ang resulta sang COVID-19 test sang nabilin nga 20 percent.

Suno kay Esmeralda handa na magbaton sang transaksyon ang munisipyo.

Pero samtang wala pa ang Lunes, ginpanugyanan niya ang mga pumuluyo nga indi anay magguwa sa ila balay.

May mga test results pa nga ginahulat nga nagka-contact kay WV 114 kag wala pa mahibaluan ang resulta.

Nangin paralisado ang operasyon sang munisipyo sang nakumpirmar nga may COVID-19 case ang banwa.| Via AM Reports