2 patay sa shooting incident sa Ajuy

By: JoMaque | June 21, 2020

Ajuy, Iloilo — Duha ang patay sa shooting incident sa Sitio Nabitasan, Brgy. Tipacla pasado las 6 subong nga aga.

Ginkilala ang mga napatay kanday Jovel Castor, driver sang motorsiklo, kag iya backrider nga si Sonny Articuna, lunsay residente sang Barangay Tipacla.

Si Jovel Castor ang manghod sang Barangay Kapitan sang Agbobolo, Ajuy nga si Punong Barangay Jomar Castor.

Sa panaysayon ni Kapitan Jomar Castor, magamo kun nakainom ang iya manghod nga si Jovel pero mabuot kag wala man sang kontra.

Si Jovel ang nagabiyahe sang motorsiklo sa Tipacla.

Ginkumpirmar naman ni Punong Barangay Cris Valino sang Barangay Tipacla nga tiyo sang iya asawa si Articuna nga angkas ni Jovel Castor.

Suno kay Valino, wala sang kontra kag mabuot man ang iya tiyo.

Pakadto sa bukid si Articuna para magdul-ong sang bubod sa iya mga manok, rason nga nag-angkas siya kay Jovel Castor.

Sa pahayag naman ni Police Captain Roy Castro, hepe sang Ajuy Police Station, wala sang may ginsakyan ang duha ka suspek kag naglakat lang pakadto sa nabukid nga portion sang lugar.

Wala pa sang motibo nga ginasundan ang mga pulis sa krimen. | via Aksyon Angel Mae Ciudad