2 patay sa shooting incident sa Tubungan, Iloilo

By: JoMaque | June 21, 2020

Iloilo — Ginkilala ni PLt. Rommel Samson, hepe sang Tubungan Police Station ang duha ka napatay sa shooting incident sa Sitio Passi, Barangay Mayang, Tubungan nga kanday Harold Tablazon, Barangay Kagawad sang Barangay Ago, kag Glenn Bunda SK Chairman sang Barangay Tagpuan.

Suno kay Samson, may daan nga kaso sang Illegal Possession of Firearms si Tablazon samtang wala naman sang malain nga record si Bunda.

May mga impormasyon man suno kay Samson nga miembro sadto sang New People’s Army (NPA) si Tablazon.

Base sa imbestigasyon sang Tubungan Police nagasakay sa ila tagsa ka motorsiklo ang duha ka mga biktima sang gintiro sang wala pa nakilan-an nga mga suspetsado.

Papauli na ang duha saTubungan sang natabo ang insidente.

Sa pagpangusisa sang kapulisan pagkatapos sang insidente may nakita nga itom nga salakyan nga pakadto sa area sang Leon.

Na-recover sa crime scene ang 32 ka basiyo sang bala sang .9mm kag 45 caliber.

Wala pa sang identity ang kapulisan sa mga suspetsado.