LSI nga taga-guimaras, nagtuyo ‘magpalagyo’ sang gindala sa quarantine facility apang napunggan
By: JoMaque | June 26, 2020
Iloilo City — Nagtuyo nga ‘magpalagyo’ ang Locally Stranded Individual nga taga-Guimaras sang gindala sa quarantine facility sa syudad.
Suno kay Major Francisco Paguia, hepe sang Police Station 1, 11:30 A.M. subong nga adlaw sang hinali lang nagpanaug sa van kag nagdalagan palayu ang 42-anyos nga babaye nga LSI sang nagpondo ang salakyan sa atubang sang hotel sa diin siya gindala.
May mga residente nga nagbulig sa driver sang van sa pagpugong sa LSI nga ginabanta 70 metro na ang kalayuon sa salakyan.
Gindala na sa quarantine facility ang LSI.
Halin sa Negros Oriental ang LSI kag nag-abot sa Dumangas Port kaina sang aga.
Ginatinguhaan pa sang Aksyon Radyo Iloilo nga makuhaan sang pahayag ang natungdan nga LSI kag ang Provincial Government sang Guimaras. | via Aksyon Aljohn Torreta