Pagpasirado ni Iloilo City Mayor Jerry Treñas sa PUV terminal sa Brgy. San Pedro, Molo, indi na maligwat –PB Lapascua

By: JoMaque | June 26, 2020

ILOILO CITY – Pinal na ang desisyon ni Iloilo City Mayor Jerry Treñas nga siraduhon ang PUV Terminal sa San Pedro, Molo.

Ini ang resulta sang pag-istorya ni San Pedro Punong Barangay Karl Lapascua sa alkalde kahapon, Hunyo 24.

Suno kay Lapascua, ginpalab-ut niya ang tanan nga concerns sang mga vendors, pero wala gin-reconsider sang alkalde ang iya desisyon.

Tubtob na lang subong nga adlaw ang pagtenir sang mga depasahero nga salakyan sa terminal, samtang tubtob na lang sa Domingo ang mga vendors.

Una na ginpa-athag ni Mayor Treñas nga magluwas nga nagalapas sa perimeter boundary ordinance, may rekomendasyon ang LTFRB nga indi na compliant sa rules and regulations sang ahensiya ang terminal gani iya ginpasira.

May plano na suno kay Treñas kun ano ang himuon sa lugar nga propedad sang syudad, samtang ginpasaylo sa Mohon Terminal sa Arevalo ang nagabiyahe nga mga salayan, lakip na ang mga vendors.