Spark or heat transport, ginatan-aw rason sang BFP-Iloilo City sa explosion sa power barge sa Bo. Obrero, Lapuz

By: JoMaque | July 5, 2020

Ginatan-aw nga naghalin sa spark ukon sa heat transport ang gintunaan sang paglupok sa power barge sang Napocor kahapon sa Zone 3, Bo. Obrero, Lapuz nga nagtuga sang oil spill sa lugar.

Suno kay Iloilo City Fire Marshal CInsp. Melanie Habawel, base sa ila inisyal nga imbestigasyon, may ginhimo nga hot work activity sa barge bangud sang nakita nga mga utod nga bolt kag cutting tools sa lugar kun diin natabo ang paglupok. Posible suno sa iya nga may ginsugpon ukon may gin-utod nga metal ang mga naga-obra sa barge.

Ginpahayag niya man nga bunker fuel ang napahamtang sa idalom kun diin naghimo hot work activity.

Gina-establish pa sang taga-BFP Iloilo City ang matuod nga ginhalinan sang paglupok.

Wala sang nasamaran sa natabu, pero may nagluntad nga oil spill pagkatapos sang paglupok. | via Aksyon Khenjo Terco