PCG Legal Affairs Team, maga-imbestigar sa nagluntad nga oil spill halin sa naglupok nga power barge sa Bo. Obrero, Lapuz

By: JoMaque | July 6, 2020, 10:17am
Aksyon Radyo Iloilo

Maga-file sang kaso kriminal ang Philippine Coast Guard batok sa tag-iya sang naglupok nga Power Barge 102 sa Bo. Obrero, Lapuz kag nagresulta sang oil spill sa siyudad sang Iloilo sang Hulyo 3.

Ini kun mapamatud-an nga may kapaltahan ukon kakulangan ang tag-iya sa insidente.

Sa ila nga statement, ginpahibalo sang PCG nga mapadulong sa siyudad ang ila legal affairs team agud magbulig sa imbestigasyon sa natabo.

Sa initial nga imbestigasyon sang PCG, isa sa apat ka mga tangke sang power barge ang naglupok.

Gilayon nga nagbutang sang pila ka segment sang oil spill boom ang coast guard agud matapna ang nagtagas nga langis.

Nag-deploy man sang oil skimmers ang PCG para sa recovery operation.

Ginpahayag sang PCG nga nagbulig man sa containment kag recovery operations ang Bureau of Fire Protection kag mga private oil companies paagi sa pagpadala sang manpower kag pagpahulam sang equipment. | via PCG