Mga quarantine facilities sa kabanwahan sa probinsiya sang Iloilo, halos na-maximize na –Provincial Administrator Atty. Suzette Mamon

By: JoMaque | July 7, 2020

ILOILO – Halos na-maximize na ang mga quarantine facilities sa kabanwahanan sa probinsiya sang Iloilo tubtob sang nagligad nga semana.

Suno kay Iloilo Provincial Administrator Atty. Suzette Mamon, kun may nagguwa sang weekend sa mga quarantine facilities, posible nga may nagsulod naman bangud nagapadayon ang repatriation sa mga overseas Filipino workers (OFWs). Gin-athag ni Mamon nga organisado kag kumpleto sa papeles ang mga nagapauli nga OFWs.

80 tubtob 90 porsyento sang mga quarantine facilities ang okupado suno kay Mamon, kag nagakabalaka na ang mga LGUs.

Pero ginpasalig niya nga may tikang nga ginahimo ang probinsiya agud ma-address ini pareho sa pagpanaug sa kabaranggayan ukon pagpangita sang pwede mahimo nga quarantine facility.

Eskwelahan ang mga ginagamit nga quarantine facility sang mga LGUs sa subong.

Gina-review kag nagapadayon na subong, suno kay Mamon, ang inventory sa mga resources agud ma-preparahan man ang posible pagpauli sang mga locally stranded individuals (LSIs) kun pasugtan na liwat ang byahe pasulod sa Western Visayas.

Magluwas diri, ginkumpirmar man niya nga may dugang nga pundo nga gin-download sa mga LGUs agud maka-set up sang ila tagsa ka quarantine facilities.| Via Firingline