Solterito halin sa Badiangan nga nagpositibo sa COVID-19, naka-isolate na; Ward sang WVMC, gin-lockdown — WVMC SNL Chief

By: JoMaque | July 12, 2020

ILOILO CITY — Gilayon nga gin-isolate ang 13-anyos nga solterito nga taga-Badiangan sang nakitaan sang sintomas sang COVID-19 samtang naka-admit Western Visayas Medical Center.

Suno kay Dr. Stephanie Abello, chief sang WVMC Sub-National Laboratory, ginkabig nga non-COVID-19 patient ang solterito sang gin-admit sa ospital bangud wala sang sintomas, wala sang exposure sa COVID-19 patient kag wala man sang travel history.

Hulyo 5 sang ginhilanat, gin-ubo kag nagsakit ang tutunlan sang pasyente, pila sa mga sintomas sang COVID-19 kag gilayon siya gin-swab test. Kagab-i, Hulyo 10 sang nagguwa nga positibo siya sa COVID-19.

Una na ginpahayag ni Badiangan Mayor Serafin Villa nga gin-operahan sa ospital ang solterito matapos nahulog sa puno sang kahoy.

Ginkumpirmar naman ni Abello nga gin-lockdown ang ward nga gin-tineran sang pasyente antes siya ginbutang sa isolation room.

Wala sang may makaguwa-pasulod suno sa iya sa ward tubtob wala pa ang resulta sang mga gin-test.

Gin-athag man ni Abello nga katuyuan pa gid sang lockdown nga malimitahan ang hulag sang mga yara sa ward agud mapunggan ang paglapta sang virus kun sa ospital gidman na-infect ang solterito.

Nagapadayon ang ginahimo nga contact tracing kag decontamination sang ospital.