Ginabanta 27 LSIs sa Manila nga manugbyahe papauli sa Western Visayas sakay sa 2Go vessel, wala ginpahanugutan nga makasakay

By: JoMaque | July 21, 2020

Manila — Wala ginpahanugutan nga makasakay sa 2Go vessel agud makapauli sa Western Visayas ang ginabanta 27 ka mga Locally Stranded Individuals sa North Harbor Pier 4 subong nga aga, Hulyo 21.

Suno kay Sepmar Silaya, 26 anyos sang Pavia, 1:00 P.M. kahapon, Hulyo 20, ang original nga schedule sang 2Go vessel sa paghalin sa Manila apang wala ini nadayon.

Gin-reschedule ini 11:00 A.M. apang ang mga Authorized Persons Outside of Residence lang ang ginpahanugutan nga makasakay.

Suno kay Silaya, wala ginpahanugutan sang Philippine Coast Guard personnel nga makasakay ang mga LSIs.

May nabaton man sila nga mensahe halin sa tagdumalahan sang 2Go angut sa pagdumilli sa pagsakay sang mga LSIs nga pakadto sa Iloilo City kag Bacolod City.

Sa port matenir ang mga natungdan tubtob nga pahanugutan sila nga makasakay.

Naghalin sa Bataan si Silaya upod ang isa pa ka indibidwal. Naga On-The-Job training sila sang naabtan sang community quarantine.

Suno kay Iloilo Provincial Administrator Suzette Mamon, gin-hold anay liwat ang pagbyahe sa mga LSIs papauli sa Iloilo.

Nag-apelar sang damlag lang ang League of the Municipalities sa Iloilo nga indi lang anay liwat pagpahanugutan ang pagbyahe sa mga LSIs.

Base sa DILG Memo Circular Number 2020- 087, travel authority kag medical certificate lang ang requirement sa pagbyahe sang mga LSIs.

Dapat nabutang sa medical certificate nga nakatapos ang LSI sang 14-day quarantine kag indi siya suspect, probable, ukon confirmed case sang COVID-19. | via Aksyon Aljohn Torreta