58 balay sa Bo. Obrero, Lapuz, gin-lockdown kasunod sang kamatayon sang lalaki nga nagpositibo sa COVID-19

By: Aine Grace Bravo

ILOILO CITY, July 23, 2020 — Ginkumpirmar ni Bo. Obrero, Lapuz Punong Barangay Ricardo Diño nga gin-lockdown ang 58 ka mga pamalay sa palibot sang balay sang lalaki nga napatay sang Hulyo 7 kag natukiban sang ulihi nga nagpositibo sa COVID-19.

Suno sa kapitan, gilayon gin-quarantine kag gin-swab ang siyam ka kaupod sa balay sang napatay.

Nagguwa ang resulta kahapon, Hulyo 22, kag diri nahibaluan nga nagpositibo man sa COVID-19 ang asawa kag anak sang napatay.

Gindala na sa isolation facility ang duha ka nagpositibo.

Nagpaguwa naman si Mayor Jerry Treñas sang Executive Order No. 105 series of 2020 nga nagapa-idalum sa Zone II sa Bo. Obrero sa surgical extreme Enhanced Community Quarantine.

Suno kay PB Diño, naghatag ang syudad sang food packs nga maka-igo sa tatlo ka adlaw sa apektado nga mga pamalay. | via Hotline/Firingline