Crackdown batuk sa mga naga-‘jumper’ sa Iloilo City, ginsuguran na sang MORE Power

By: JoMaque | July 28, 2020

Iloilo City — Ginsuguran kaina sang MORE Electric and Power Corporation ang dungan nga mga operasyon kontra sa nagahimo sang illegal connection.

Suno kay Mr. Jonathan Cabrera, isa sa mga spokespersons sang MORE Power, 10 ka teams nga may kaupod nga mga pulis ang gin-deploy sa mga barangay. Una nga gin-operate kaina sang aga ang Sto. Niño Sur kag Sto. Niño Norte, Arevalo sa diin 100 ka jumper nga naga-connect sa secondary line ang ginpang-utod.

Indi dali-dali nga makabalik takud sang illegal connections, suno kay Cabrera, bangud may security guards sila nga ginabilin sa na-operate na nga barangay. May maga-roving man nga mga pulis.

Sige-sige na ini nga mga operasyon, suno kay Cabrera.

Sa lima ka bulan na nga pag-operate sang MORE Power bilang power distributor, makapila ka beses na suno kay Cabrera nga ginapahanumdom nila ang mga naga-jumber nga magpatakud sang kuntador.

Nakahimo naman sang operations ang MORE Power sang nagliligad nga mga semana kag ginabanta sa 10 ka ang napasakaan sang kaso.