Number 2 most wanted person sa Western Visayas, patay sa police operation sa Calinog

By: Aine Grace Bravo

CALINOG, Ilo., August 14, 2020 — Calinog, Iloilo–Patay ang Number 2 Most Wanted Person sa Western Visayas nga si Jenel Chiva matapos ginpahayag nagbato sa kapulisan nga nagserbe sa iya sang warrant of arrest kaina sang kaagahon bangud sang kaso kriminal.

Suno kay Police Captain Genesis Roque, hepe sang Calinog Police Station, ginserbihan sang warrant las 5:25 sang kaagahon sa Sitio Bulikao, Barangay Alibunan, Calinog si Chiva pero nagbato.

Upod sa mga nagserbe sang warrant ang Regional Intelligence Division, 602nd Company sang Regional Mobile Force 6 kag Calinog MPS.

Si Chiva suno kay Roque ang leader sang robbery group kag guns-for-hire.

Base sa inisyal nga impormasyon, na-recover sa crime scene ang granada kag mga pusil.

Si Chiva ang ginatudlo nga leader sang Chiva Fajardo Group nga nag-operate nga ginapasibangdan sa madamo nga robbery incidents sadto.

2010 sang napatay ang iya mga utod nga sanday Gilbert kag Joey sa engkwentro batok sa composite teams sang PNP kag Philippine Army sa Calinog sang tuyo kuntani sila nga serbihan sang warrant of arrest may kaangtanan sa mga insidente sang robberies sa probinsiya sang Iloilo ilabe na sa central kag northern Iloilo kag konektado man sa grupo sa siyudad sang Iloilo.

Ginpasibangud sa ila grupo sadto ang robbery cases sa negosyante sang scrap iron kag bugas, mga kolektor sang lending companies pati na ang manugbalot kag manugbaligya sang saging kag isda.

Ginpahayag nga nagtrabaho man sila para sa mga pulitiko.

Padayon nga ginatipon sang Aksyon Radyo Iloilo ang dugang nga impormasyon angut sini nga breaking story. | via Aksyon Hotline