SK officials sa San Juan, Molo, nakatipon sang kwarta, food packs para sa mga residente nga naapektuhan sang lockdown sa barangay

By: JoMaque | August 16, 2020

ILOILO CITY — Nakatipon sang cash kag food packs ang Sangguniang Kabataan (SK) Officials sang Brgy. San Juan, Molo agud ipanghatag sa mga pumuluyo nga naapektuhan sang lockdown.

Suno kay SK Kagawad Robinson Tortola, nabalaka ang SK council sa mga pumuluyo nga apektado sang lockdown ilabi na ang mga nadulaan sang palangabuhian rason nga nagpangita sila sang paagi agud makatipon sang donasyon.

Nag-post siya sa Facebook sa mga luyag mag-donate sa mga residente.

Nakibot sila sang madamo ang nag-message agud magbulig. Nakabaton sila sang ginabanta P9,000 nga cash, food packs kag mga facemask halin sa nagkalain-lain nga private individuals.

Dugang ni Tortola, gin-prayoridad ang mga mas nagakinahanglan sang food packs.

Kada adlaw suno sa iya naga-distribute sila sang food packs sa mga residente.

Nagapasalamat ang SK Council sang San Juan, Molo sa mga nagbulig sa mga pumuluyo sang ila barangay. | via Aksyon Farrah Mae Morano