Mahinay nga pag-release sang RT-PCR test result, isa sa mga rason kun ngaa indi mabakantehan gilayon ang mga hotels sa siyudad nga ginhimo nga quarantine facility — OWWA 6

By: JoMaque | August 23, 2020

Iloilo City — Ginapangabay sang Overseas Workers Welfare Administration (OWWA) 6 nga mapadasig ang pag-release sang mga RT-PCR test result sang mga OFWs nga naka-quarantine subong sa mga hotels sa Iloilo City agud makapauli na sila kag mabakantehan ang mga rooms nga okupado.

Isa sa mga rason kun ngaa indi gilayon mabakante ang mga kwarto suno kay OWWA 6 Director Rizza Joy Moldes, ang madugay nga releasing sang results bangud indi makaguwa ang mga OFWs kun wala pa ang ila negative nga resulta.

Nabudlayan kagab-i ang taga-OWWA 6 nga makakita sang hotel nga pateniran sang mga nag-alabot nga OFWs bangud napuno na ang mga hotels sa Iloilo City nga ginhimo nga quarantine facility.

Isa pa gid ka rason suno kay Moldes kun ngaa nabudlayan sila nga makakita sang hotel sa Iloilo City para pateniran sa mga OFWs, amo nga may mga hotels nga indi gusto magbaton sang mga OFWs.