ArchivesKalusuganLokalUncategorized

14 patay, 75 pilason sa twin bombings sa Jolo, Sulu

By: JoMaque | August 25, 2020

Pito ka soldado, isa ka pulis kag anum ka sibilyan ang patay sa paglupok sang mga bomba sa Jolo Sulu kahapon, Agosto 14.

Patay man ang suicide bomber, suno sa Armed Forces of the Philippines.  Pilason naman ang 48 ka sibilyan, 21 ka soldado kag anum ka pulis.

Suno kay Lieutenant Colonel Ronald Mateo, civil military relations officer sang 11th Infantry Division, una nga naglupok ang bomba sa motorsiklo nga nakaparada malapit sa mga soldado pasado las-11 sang aga.

Base sa pahayag sang mga tropa, madasig nga nagpalagyo ang driver sang motorsiklo. Gina-imbestigaran pa ang identity sang driver.

 Samtang gina-cordone sang mga tropa ang bomb site, nagtuyo nga magsulod ang babaye nga suicide bomber kag ginpalupok ang kaulingon mga ala-una sa hapon nga nagresulta sa dugang nga napatay kag nasamaran.

Naka-lockdown ang Metro Jolo agud malikawan ang dugang nga mga insidente.

Ginpasiguro naman sang Joint Task Force Sulu ang publiko nga padayon sila nga magabantay sa palibot sang probinsya.          

Ginkondenar naman sang Malacañang ang twin bombings.

Nagpasalig man sang bulig ang Malacañang, suno kay Presidential Secretary Harry Roque. | via DZRH/PR/GMA

Leave a Reply