Alkalde sang Jamindan, Capiz, nagpositibo sa COVID-19
By: JoMaque | August 31, 2020
Capiz – Gin-anunsyar ni Jamindan, Capiz Mayor Mac Arthur Valdemar ang pagpositibo niya sa COVID-19 paagi sa iya Facebook account.
Suno kay Valdemar, nagpaidalom siya sa swab test matapos nagka-contact sa COVID-19 positive bangud naka-updanay sila sang Agosto 21 sa isa ka programa sa Barangay Agcagay, Jamindan.
Subong nga adlaw, nagguwa ang resulta sang RT PCR nga positibo siya sa virus. Asymptomatic si Mayor Valdemar.
Nagapaidalom na ang alkalde sa strict home quarantine sugod sang Huwebes, Agosto 27.
Nagpanawagan man siya sa mga nagka-contact sa iya sugod Agosto 23 nga magpaidalom sa self isolation kag monitoring kag mag-contact sa COVID hotline number 09079116827 para ma-assess sang health professionals para sa contact tracing.
Nagapadayon subong ang contact tracing.
Sang nagligad nga semana, nag-anunsyar man si Capiz Governor Esteban Contreras nga positibo siya sa COVID-19.