10 seafarers nga taga-Western Visayas, nalakip sa mga missing nga crew sang livestock ship sa Japan

By: JoMaque | Sept. 6, 2020

Iloilo City — 10 ka mga seafarers nga taga-Western Visayas ang nalakip sa mga crew sang na-missing nga ship Gulf Livestock 1 sa kadagatan sang Japan.

Ini ang ginkumpirmar ni Overseas Workers Welfare Administration ukon OWWA 6 Director Rizza Joy Moldes.

Sa 10 suno kay Moldes, isa diri ang taga-Iloilo City, isa taga-Bacolod City kag walo ang taga-Iloilo Province.

Pero posible pa nga madugangan ang numero sang taga-Region 6 nga nalista nga missing suno kay Moldes bangud gina-verify pa nila ang pangalan sang mga Filipino crew bangud sa National Capital Region ukon NCR ang address nga nabutang sa ila data base.

Dugang ni Moldes nga naga-coordinate na sila sa pamilya sang mga missing.

Base naman sa nabaton nga impormasyon sang Aksyon Radyo Iloilo, indi magnubo sa duha ang mga taga-Iloilo City.

Sa probinsiya sang Iloilo, may mga crew nga taga- Guimbal, Oton, Tubungan kag Sta. Barbara.

May 39 ka mga Filipino crews ang barko nga halin sa New Zealand kag pakadto sa China sang naabtan sang bagyo sa Japan.

Sa pinaka-ulihi naman nga update halin sa Department of Foreign Affairs, gin-report sang Philippine Embassy in Tokyo kag Philippine Consulate General sa Osaka nga temporaryo gin-untat sang Japanese Coast Guard ang search and rescue operations bangud sang ginapaabot nga isa pa gid ka bagyo sa Japan subong nga weekend.

Nakapakig-angut naman suno sa DFA ang duha ka mga Filipino survivors sa ila tagsa ka pamilya.