9 ka tuig nga bata nga babaye nga napatay sa vehicular accident sa Jaro, ginrekomendar sang doctor sa WVMC nga i-cremate bangud ginakonsiderar nga suspect case sang COVID-19; Iloy sang bata, nagreklamo

By: JoMaque | Sept. 7, 2020

Iloilo City — Ginakwestyon sang iloy sang 9 ka tuig nga bata nga babaye ang rekomendasyon sang doctor sang Western Visayas Medical Center nga i-cremate ang iya bata nga napatay sa vehicular accident sa Brgy. Democracia, Jaro sang Setyembre 5 sang aga.

Suno kay Mrs. Emma Agodilos, las 8 sang aga sang ginpahibalo siya nga nabungguan sang multicab ang iya bata nga si Aleah Reynz Fruelda kag gindala sang driver sa WVMC.

Sang nag-abot sa ospital ang iloy, nakita niya ang iya hinablos nga nagabantay sa iya bata nga nagapungko sa wheelchair, lipong kag wala gina-asikaso

Naakig pa suno sa iya ang iya upod bangud nagapalanglapsi na ang iya bata.

Antes magsulod sa emergency room, ginhambalan si Mrs. Agodilos nga indi na siya makaguwa kun makasulod sa ER bangud may COVID-19 cases.

Nagrisgo ang iloy para sa kabuhi sang iya bata.

Ginpahayag ni Mrs. Agodilos nga sang yara na sa sulod sang ER, ginpahigda lang ang iya bata kag wala man lang ginlantaw ang iya pilas gani nakita niya nga naga-agunto ang bata.

Sang ulihi suno sa iya, ginhatagan sang oxygen si Aleah, gin-X-ray kag gin-ultra sound sa diin nakita nga may bleeding sa sulod sang iya tiyan.

I-CT scan kuntani ang iya bata apang wala nadayon bangud nagawaras.

Sang ulihi, gin-catheter ang iya bata pero nagwaras naman bangud nga masakit.

Nagsinggitan na suno kay Mrs. Agodilos ang iya bata nga “nakapoy na ‘ko, Mama.”

Ginbantayan ni Emma ang iya bata kag ginapukaw-pukaw pa niya sang makapila ka beses tubtub nga wala na nakabugtaw.

Ginpahayag ni Emma nga certain Doctor Cabrera ang naga-asikaso sa iya bata.

Las 11:45 sang aga (Setyembre 5) sang gindeklarar suno sa iya sang doktor nga napatay si Aleah.

Ginhambalan sang doktor si Emma nga i-swab test ang iya bata. Samtang wala pa ang resulta sang swab test, ginhambalan man sang doktor ang iloy nga i-cremate ang iya bata bangud COVID-19-suspect case siya.

Wala nagpasugot ang iloy bangud luyag niya nga ihamyang ang iya bata kag nagapati siya nga napatay sa vehicular accident si Aleah.

Nanindugan suno sa iya ang doktor nga base sa protocol sang Department of Health, kinahanglan nga i-cremate ang iya bata bangud na-expose sa ER.

Ginatinguhaan pa sang Aksyon Radyo Iloilo nga makuhaan sang pahayag ang WVMC angut sini.