Capiz province, Roxas City kag Bacolod City, sakup sang moratorium sa pagpauli sang mga LSIs sa Western Visayas

By: JoMaque | Sept. 9, 2020

ILOILO CITY — Indi tanan nga Local Government Units (LGUs) sa Western Visayas ang sakop sang temporary suspension sa pagbaton sa mga Locally Stranded Individuals (LSIs).

Ini ang gin-athag ni Regional Task Force Against COVID-19 Spokesperson Ma. Aletha Nogra kasunod sang sinapol sang RTF kag Regional Inter-Agency Task Force (RIATF) kaina, Setyembre 8.

Suno kay Nogra, sakup lang sang moratorium ang Roxas City, probinsiya sang Capiz, kag Bacolod City bangud sila lang ang nag-request.

Nagsugod subong nga adlaw kag matakop sa Setyembre 22 ang moratorium sa pagbaton sa mga LSIs sang Roxas City kag Capiz, samtang matakop sa Setyembre 30 ang moratorium sa mga LSIs sa Bacolod City.

Dugang pa ni Nogra, nagapadayon ang pagbyahe kag pagbaton sang mga LSIs sa mga nabilin nga probinsiya kag siyudad sa Rehiyon 6.

Ginpasiguro man ni Nogra nga padal-an nila sang kopya sang official advisory sang RTF kag RIATF ang Aklan kasunod sang ginpaguwa nga advisory ni Aklan Governor Florencio Miraflores nga indi sila magbaton anay sang LSIs.

Base pa sa advisory sang gobernador indi man pagtugutan nga mag-agi sa Aklan ang LSIs nga mapauli sa iban nga probinsiya sa Western Visayas.

Suno kay Nogra, pwede liwat nga makapaguwa sang advisory ang Aklan nga na-base na sa advisory sang RTF kag RIATF. | Via PM Reports