Mga himata sang Ilonggo crew members sang nadula nga Gulf Livestock 1, nagpangayo bulig kay Gov. Defensor

By: Aine Grace Bravo

ILOILO CITY, September 11, 2020 — Nagpadulong kay Governor Arthur Defensor, Jr. kahapon, Setyembre 10, ang mga himata sang pila ka taga-probinsya nga crew members sang Gulf Livestock 1 nga ginapatihan naglugdang sa kadagatan sang Japan sang Setyembre 2.

Nagpangayo sang bulig ang mga himata agud mapadasig ang search and rescue operation.

Base sa record sang OWWA 6, siyam ka crew members ang taga-probinsya sa diin duha ang taga-Pototan, duha ang taga-Oton kag tag-isa ang taga-Guimbal, Pavia, Sta. Barbara, Tubungan kag Zarraga.

Nagkadto kahapon sa opisina sang gobernador ang asawa sang seafarers nga taga-Pototan kag Oton.

Isa sa mga nagkadto sa Kapitolyo si Mrs. Cariza Marie Pilota, asawa ni Jay Pilota sang Pototan nga nagalaum gihapon nga makita nga buhi ang iya bana kag iban pa nga crew.

Ginmanduan na ni Defensor ang Public Employment Service Office nga mag-coordinate sa concerned government agencies para sa updates sa ginahimo nga pagpangita.

36 pa ka Pinoy seafarers, duha ka taga-Australia kag duha ka taga-New Zealand ang missing, duha ka Pinoy ang na-rescue kag isa ang napatay. | via Balita Halin sa Kapitolyo