Iloy sang 9-anyos nga bata nga babaye nga napatay sa vehicular accident sa Jaro, wala sang plano nga magpasaka sang kaso sa driver sang multicab
By: JoMaque | September 12, 2020
Iloilo City – Indi na magpasaka sang kaso ang iloy sang siyam ka tuig nga si Aleah Agodilos sa driver sang multicab nga nakabunggo sa bata.
Suno kay Emma Agodilos, iloy sang biktima, indi naman mabalik ang kabuhi sang iya bata kun magpasaka siya sang kaso sa driver.
Dugang pa ni Emma, naluoy siya bangud indi man hungod sang driver kag aksidente ang natabo sa iya bata.
Ginalauman naman nga maabot sa Lunes, Setyembre 14, ang resulta sang RT-PCR test ni Aleah, suno kay Emma.
Una na nga nagreklamo si Emma bangud ginrekomendar sang doktor nga i-cremate ang iya bata. Pero nanindugan ang tagdumalahan sang ospital nga wala sang may nalapas nga protocol sa pagkabig sa bata nga suspect case kag pagdala sa iya sa Emergency Room para sa COVID-19 patients.
Birthday sa subong ni Aleah, suno kay Emma, pero masubo bangud indi na ini masaulog sang iya bata.