Mga mapauli nga ROFs, LSIs nga taga-Guimaras, ipaidalom sa RT-PCR test kag i-quarantine sang 14-adlaw

By: JoMaque | September 16, 2020

GUIMARAS – – Ipaidalom sa RT-PCR test kag i-quarantine sa siyudad sang Iloilo ang mga returning overseas Filipinos (ROFs) kag locally stranded individuals (LSIs) nga taga- Guimaras.

Suno kay Guimaras Vice Governor John Edward Gando, nabase ini sa Executive Order No. 68 ni Governor Samuel Gumarin.

Ang mga may negatibo nga resulta ang dal-on sa quarantine facility sa probinsiya kag didto na patapuson ang 14 ka adlaw nga pag-quarantine.

Sa 106 cases sang COVID-19 sa Guimaras, ginpahayag ni Gando nga masobra 46 percent ang mga ROFs kag LSIs.

Ang ROFs kag LSIs man suno sa iya ang nag-contribute sa pagtaas sang ila kaso.

Wala man suno sa iya sang kabalak-an bangud ang probinsiya, nagabayad sa quarantine facilities nga gina-tineran kag pagpaidalom sa RT-PCR test sang mga ROFs kag LSIs.

Dugang pa niya nga madamo na sang sirkumstansiya nga may negative results sang RT-PCR ang ROFs halin sa point of origin pero naga-positibo sa COVID-19 kun liwat i-test pag-abot sa siyudad. | via PM Reports