Bangkay sang 5 ka tuig nga bata nga nahulog sa suba sa Talongadian, Sta. Barbara, nakit-an kahapon, Setyembre 19

By: JoMaque | September 20, 2020

Iloilo — Ginsaysay ni Felipe Galino, commander sang Mountain Tiger Search and Rescue Inc. kun paano nakit-an ang bangkay ni Mary Grace Sobreviva, ang lima ka tuig nga bata nga nahulog sa suba sa Barangay Talongadian, Sta. Barbara sang Biyernes, Setyembre 18.

Suno kay Galino, nagapang-utod sang sanga sang natumba nga kamunsil ang iya mga upod nga mga rescuers sa barangay Pal-agon, Sta. Barbara sang nahulog man sa suba ang binangon nga ila ginagamit.

Ginsalum suno sa iya sang ila mga upod ang binangon apang wala nila nakit-an tubtob nga may nahikapan sila nga daw kasubong sang jogging pants.Sang ginkuha sang mga rescuers, didto kag nakit-an ang bangkay sang bata.

Ginabanta sa 1.5km ang kalayuon sang gin-anuran sang bata sa lugar kun diin siya nahulog dugang pa ni Galino.